Curtalin

Dərman vasitəsinin istifadəsi üzrə təlimat (xəstələr üçün)
KURTALİN        10% yerli istifadə üçün sprey
CURTALIN
Beynəlxalq patentləşdirilməmiş adı: Lidocaine
Tərkibi
Təsiredici maddə:   1 ml məhlulun tərkibində 100 mq lidokain vardır.
Köməkçi maddələr: polietilenqlikol, natrium saxarin, nanə dadlandırıcısı, 96%-li etanol,
ionsuzlaşdırılmış su.
Təsviri
Nanə dadlı şəffaf məhluldur.
Farmakoterapevtik qrupu
Səthi anesteziya üçün nəzərdə tutulmuş lokal anestetik.
ATC kodu: D04AB01.
Farmakoloji xüsusiyyətləri
Farmakodinamikası
Səthi anesteziya üçün istifadə olunan lokal anestetikdir. Qısa müddətli təsirə malikdir.Təsir mexanizmi neyron membranının natrium ionları üçün keçiriciliyinin azalmasına əsaslanır. Nəticədə, depolyarizasiya sürəti azalır və həyəcanlanma həddi yüksəlir, bu da geri dönən yerli keyiməyə səbəb olur. Lidokain bədənin müxtəlif hissələrində keçici anesteziyaya nail olmaq üçün istifadə olunur. Yerli tətbiq edildikdə qan damarlarını genişləndirir, yerli qıcıqlandırıcı təsir göstərmir. Analgezik təsirə malikdir. Effekt selikli qişalara və ya dəriyə tətbiq edildikdən 1-5 dəqiqə sonra inkişaf edir və 30-60 dəqiqə davam edir.
Farmakokinetikası
Sorulması
Selikli qişalardan (xüsusilə qırtlaq və tənəffüs yollarından) sürətlə sorulur. Dərmanın sorulma dərəcəsi selikli qişanın qan təchizatından, dərmanın dozasından, yerin lokalizasiyası və tətbiq müddətindən asılıdır. Yuxarı tənəffüs yollarının selikli qişasına tətbiq edildikdən sonra mədə-bağırsaq traktında qismən udulur və təsirsiz hala gəlir. Ağız boşluğunun və yuxarı tənəffüs yollarının selikli qişasına tətbiq edildikdə Cmax-a çatma vaxtı 10-20 dəqiqədir.
Paylanması
Zülallarla birləşmə faizi preparatın konsentrasiyasından asılıdır və 1-4 µg/ml (4,3-17,2 µmol/l) konsentrasiyada 60-80% təşkil edir. Tez paylanır (T½ paylanma fazası – 6-9 dəqiqə), əvvəlcə güclü qan təchizatı olan toxumalara (ürək, ağciyər, beyin, qaraciyər, dalaq), sonra piy və əzələ toxumalarına daxil olur. HEB-i və plansentar baryeri keçir. Ana südü ilə ifraz olunur (ananın plazmasındakı konsentrasiyanın 40%-i).
Metabolizmi və xaric olması
Mikrosomal fermentlərin iştirakı ilə qaraciyərdə metabolizmə uğrayır (90-95%). Amin qrupunun dezalkilləşməsi və amid rabitəsinin qırılması ilə lidokain ilə müqayisədə daha az aktiv metabolitlərin (monoetilqlisineksilidin və qlisineksilidin) əmələ gəlir, T½ müvafiq olaraq 2 saat və 10 saat təşkil edir.
Öd və böyrəklər ilə xaric olunur (10%-ə qədər dəyişilməmiş şəkildə).
Xüsusi xəstə qruplarında farmakokinetikası
Qaraciyər xəstəliklərində metabolizm sürəti azalır və normal dəyərin 50%-dən 10%-ə qədər azalır.
Xroniki böyrək çatışmazlığında metabolitlərin kumulyasiyası mümkündür.
İstifadəsinə göstərişlər

Bronxların müayinəsi zamanı keyləşdirici kimi.
Ağız, burun və boğaz boşluqlarında kiçik cərrahi əməliyyatlarda ağrıların aradan qaldırılmasında köməkçi kimi.
Üst çənə boşluğunda (maksilyar sinus) inyeksiya və ya iynə ilə edilən müdaxilələrdə.
Doğuş zamanı: doğuşun son mərhələsində cərrahi müdaxilə və yara tikişindən əvvəl ağrıların

     aradan qaldırılmasında köməkçi olaraq.

Stomatologiyada: məsələn, inyeksiyadan əvvəl ağrı hissini aradan qaldırmaq üçün.

Əks göstərişlər
Preparatın tərkibində olan komponentlərdən hər hansı birinə qarşı hiperhəssaslıq. Eyni sinifdən olan hər hansı digər lokal anesteziklərə (məsələn, prilokain və ya bupivakain) qarşı allergiyanız varsa, əks göstərişdir.
Xüsusi göstərişlər və ehtiyat tədbirləri
Aşağıda qeyd olunan hallarda preparat ehtiyatla təyin olunmalıdır:

ağız boşluğunun selikli qişasının zədələnmələri zamanı (əlavə təsirlərin baş vermə riski artır)
döş qəfəsinin infeksiyaları zamanı
keçirilmiş güclü şok zamanı
ürək-damar xəstəlikləri, həmçinin ürək çatışmazlığı zamanı
arterial təzyiqin aşağı olması zamanı
ürək döyüntülərinin az olması, böyrək və qaraciyər xəstəlikləri zamanı
porfiriya adlı nadir qan piqmentləri xəstəliyi zamanı və ya ailə üzvlərindən birində bu xəstəlik varsa,
antiaritmik preparatların qəbulu zamanı
yaşlılarda və xəstələrdə ehtiyatla təyin olunmalıdır.

Preparatın istifadəsi zamanı udlaq və ağız boşluğunun keyiməsi nəticəsində udqunmada çətinlik yarana bilər. Ağız boşluğunun keyiməsi nəticəsində dil və yanaqları dişləmə ehtimalı artır. Bu səbəbdən preparatın istifadəsindən 60 dəqiqə sonra yemək yemək məsləhət görülür. Bu hal uşaqlarda xüsusilə nəzarətdə saxlanılmalıdır.
Digər dərman vasitələri ilə qarşılıqlı təsiri
Simetidin və propranolol lidokainin qaraciyər klirensini azaldır (mikrosomal oksidləşmənin ləngiməsi və qaraciyər qan axınının azalması hesabına maddələr mübadiləsinin zəifləməsi baş verir) və toksik təsirlərin inkişaf riskini artırır (süstlük vəziyyəti, yuxululuq, bradikardiya, paresteziya daxil olmaqla).
Barbituratlar, fenitoin, rifampisin (mikrosomal qaraciyər fermentlərinin induktorları) effektivliyini azaldır (dozanın artırılması tələb oluna bilər).
Aymalin, fenitoin, verapamil, xinidin, amiodaron ilə birlikdə istifadə edildikdə, mənfi inotrop təsir güclənə bilər. Beta-blokatorlarla birlikdə qəbulu bradikardiyanın inkişaf riskini artırır.
Kurareyəbənzər dərman vasitələri  əzələlərin relaksasiyasını artırır.
Prokainamid mərkəzi sinir sisteminin oyanıqlığını, halüsinasiyalar riskini artırır.
Lidokainin yuxugətirici və sedativ preparatlarla eyni vaxtda təyin edilməsi ilə onların mərkəzi sinir sisteminə inhibəedici təsirini artıra bilər.
Lidokainin təsiri fonunda hexobarbital və ya natrium tiopentalın venadaxili yeridilməsi tənəffüsün çətinləşməsinə səbəb ola bilər.
MAO inhibitorlarının təsiri altında lidokainin yerli anestetik təsirinin artırması mümkündür.
Lidokain və polimiksin B-nin eyni vaxtda istifadəsi zamanı sinir-əzələ ötürücülüyünün zəifləməsi baş verə bilər, buna görə də bu vəziyyətdə xəstənin tənəffüs funksiyasını nəzarətdə saxlamaq lazımdır.
Hamiləlik və laktasiya dövründə istifadəsi
Hamiləlik və laktasiya zamanı preparatın təhlükəsizliyi araşdırılmamışdır. Preparat yalnız istifadəsinə mütləq göstəriş olduqda təyin edilə bilər.
Preparatı istifadə etməzdən əvvəl həkiminizlə və ya əczaçı ilə məsləhətləşin.
Əgər hamiləsinizsə və ya hamilə qalmağı planlaşdırırsınızsa, CURTALIN ilə müalicəyə başlamazdan əvvəl həkiminizə məlumat verin.
Müalicə zamanı hamilə olduğunuzu başa düşsəniz, dərhal həkiminizə və ya əczaçıya müraciət edin.
Lidokain ana südü ilə xaric olur, lakin adi terapevtik dozalarda yerli tətbiq edildikdən sonra süddə ifraz olunan miqdar  körpəyə hər hansı bir zərər vermək üçün çox azdır.
Nəqliyyat vasitəsini və digər potensial təhlükəli mexanizmləri idarəetmə qabiliyyətinə təsiri
Dozadan asılı olaraq CURTALIN beyin funksiyasına çox cüzi də olsa təsir göstərə bilər. O, həmçinin müvəqqəti olaraq hərəkət koordinasiyasına, məsələn, avtomobil idarə etmək və ya digər mexanizmləri idarə etmək qabiliyyətinə təsir göstərə bilər. Bu, dərmanın bədənin hansı hissəsində və nə qədər istifadə olunduğundan asılıdır. Bu barədə həkiminizlə və ya diş həkiminizlə məsləhətləşin.
İstifadə qaydası və dozası
Doza həkim tərəfindən müəyyən olunur. Doza ağrı kəsicinin növündən, həmçinin xəstənin yaşından və fiziki vəziyyətinizdən asılı olaraq təyin olunur.
Əgər CURTALİN-i evdə istifadə etmək məsləhət görülübsə, həkimin və ya diş həkiminin tövsiyə etdiyi dozanı aşmaq olmaz. Əmin deyilsinizsə, həkiminizə və ya diş həkiminizə müraciət edin.
20-dən çox sprey tətbiq etməyin. Spreyi mümkün qədər az dozada istifadə etmək lazımdır. Gözlərə püskürtməkdən çəkinmək lazımdır. Sprey başlığı mailidir və bu şəkildə düzgün işləyir. Əgər qapağın formasını dəyişməyə çalışsanız, o, qırıla bilər.
Uşaqlarda ehtiyatla istifadə olunmalıdır. 8 yaşa qədər uşaqlarda tonzillektomiya və adenotomiyadan əvvəl lokal anesteziya üçün tövsiyə edilmir.
Əlavə təsirləri
Bütün dərmanlar kimi, CURTALİN-in tərkibindəki maddələrə həssas olan insanlarda əlavə təsirlər ola bilər.
CURTALIN-dən arzuolunmaz təsirlər nadirdir.
Aşağıdakılardan hər hansı biri baş verərsə, CURTALIN-dən istifadəni dayandırın və dərhal həkiminizə məlumat verin və ya ən yaxın xəstəxananın təcili yardım şöbəsinə müraciət edin:

Üzün, dodaqların, dilin və ya boğazın şişməsi. Bu, udma çətinliyinə səbəb ola bilər.
Əllərin, ayaqların və topuqların qəfil və şiddətli şişməsi.
Qaşınma, köpəşmə, qızdırma, tənəffüs çətinliyi və huşunu itirmə kimi simptomlarla inkişaf edə bilən anafilaktik şok.

Bütün bunlar çox ciddi yan təsirlərdir.
Əgər bunlardan hər hansı biri Sizdə varsa, bu, Sizin CURTALİN-ə qarşı ciddi allergiyanız olduğunu bildirir. Təcili tibbi yardıma və ya xəstəxanaya yerləşdirməyə ehtiyacınız ola bilər.
Bütün bu çox ciddi yan təsirlər çox nadirdir.
Aşağıdakılardan hər hansı birini görsəniz, dərhal həkiminizə məlumat verin və ya ən yaxın xəstəxananın təcili yardım şöbəsinə müraciət edin:

Allergik reaksiya
Əsəbilik
Başgicəllənmə
Huşun itməsi
Yuxululuq
Boğazda ağrı
Boğuq səs və ya səsin itməsi
Qan təzyiqinin aşağı düşməsi. Bu, başgicəllənməyə səbəb ola bilər.
Sinə ağrısı
Qıcolma
Ürək döyüntülərinin sayının azalması.
Nəfəs almada çətinlik və ya təngnəfəslik
Tənəffüsün dayanması və ürəyin dayanması.

Bütün bunlar ciddi yan təsirlərdir. Təcili tibbi yardım tələb oluna bilər. Ciddi yan təsirlər çox nadirdir.
Aşağıdakılardan hər hansı birini görsəniz, həkiminizə bildirin:

Tətbiq sahəsində regional qıcıqlanma (həssaslıq),
Narahatlıq hissi,
Sinir qıcıqlanması,
Sistem başgicəllənmə,
Bulanıq və ya ikili görmə, qusma, istiyə və ya soyuğa həssaslıq və ya uyuşma.

Bunlar CURTALİN-in yüngül yan təsirləridir.
Bu vərəqədə qeyd olunmayan hər hansı əlavə təsirlərlə qarşılaşsanız, həkiminizə və ya əczaçınıza məlumat verin.
Doza həddinin aşılması
Simptomları: tərləmə, dərinin avazıması, başgicəllənmə, baş ağrısı, bulanıq görmə, qulaqlarda küy, diplopiya, qan təzyiqinin azalması, bradikardiya, aritmiya, yuxululuq, titrəmə, uyuşma, tremor, narahatlıq, təşviş, konvulsiyalar, methemoglobinemiya, ürəyin dayanması.
Müalicəsi: intoksikasiyanın ilk əlamətləri görünəndə (başgicəllənmə, ürəkbulanma, qusma, eyforiya), preparatın sonrakı istifadəsi  dayandırılır, xəstə üfüqi vəziyyətə keçirilir; oksigen inhalyasiyası təyin edilməlidir; qıcolmalar zamanı - 10 mq diazepam venadaxili yeridilir; bradikardiya zamanı - m-xolinoblokatorlar (atropin), vazokonstriktorlar (norepinefrin, fenilefrin) təyin olunur. Dializ effektsizdir.
Buraxılış forması
50 ml məhlul ölçülü sprey pompası ilə bağlanmış şəffaf şüşə flakonda. 1 flakon plastik pulverizator və içlik vərəqəilə birlikdə karton qutuya qablaşdırılır.
Saxlanma şəraiti
25ºС temperaturdan yüksək olmayan, işıqdan qorumaqla və uşaqların əli çatmayan yerdə saxlamaq lazımdır. Dondurmaq olmaz. 8ºC-dən aşağı temperaturda saxlandıqda çöküntü baş verə bilər. Preparat otaq temperaturunda saxlandıqda bu çöküntü yox olur.
Yararlılıq müddəti
2 il.
Yararlılıq müddəti bitdikdən sonra istifadə etmək olmaz.
Aptekdən buraxılma şərti
Resept əsasında buraxılır.
İstehsalçı
Pharma Plant İlaç Sanayi ve Ticaret A.Ş., Turkey.
Koşuyolu, Vakıf Sk. No:4, 34718 Kadıköy/İstanbul, Turkey.
Qeydiyyat vəsiqəsinin sahibi
Novator Pharma İlaç ve Kimya San. ve  Tic. Ltd. Şti., Turkey.
Kızılırmak mah., Muhsin Yazıcıoğlu cad. Protokol plaza no:39 kat:14/81 Çankaya-Ankara, Turkey.
Məhsulun və əmtəə nişanının sahibi
Novator Pharma LLP, Böyük Britaniya.